Вверх

Уртту-щин цIуллу-сагъшиврул бакIщаращир!

Цинявннан кIулли уртту-щин хайр бусса душиву, амма чIявуминнан къакIулли цумур урттуя цуксса хайр буссарив, цуми дукан къабучIиссарив? Бусанну жунна кIулсса уртту-щинал хайрдануя ва заралдания.

1. ЩЮЛЛИ ЧИМУС

Щюлли чимус хъинссар иммунитет цIакь дан, оьттуву нацIушиву ва холестерин лагь байссар, оь хьюму байссар, тромбарду хьунсса нигьачIаву думиннан хъинссар, инфаркт, инсульт, простатит, аденома простаты, онкология ва м.ц. цIуцIавуртту думиннал чурххал тагьар ххуй дайссар.

2. ГЪАРАН (УКРОП)

Гъарандалул дурухлу лагь дайссар, хъинссар къюкIлил, туннурдал цIуцIавурттан, давление лахъминнан. Гъарандалул, дукралух тамахI бутайссар, дукра лялиян дан кумаг байссар, оьттун хъинссар, анемиялун, янил чаннан хъинссар, за дакIний личIаврин хъинссар.

3. КИНЗА (КОРИАНДР)

Мудан кинза дукралувун ишла дуллалинал къюкIлил, туннурдал тагьар ххуйсса дикIайссар, дукра ххуйну лялияйссар, давление лахъминнан, дурухлу думиннан хъинссар.

4. ПЕТРУШКА

Петрушка хъинссар давление думиннан, дурухлу думиннан, ччаруллал цIуцIаврин, простаталун, простаталул аденомалул цIуцIавурттан. Петрушкалуву чIявуссар цинк, железа, мунияту хъинссар анемиялун, диабет думиннан, хъинссар онкологиялун профилактика хIисаврайгу.

5. ТАРХУН

Ва уртту хъинссар инсан увххун, багьтIатIал хьунигу, нерварду паракьат дангу, инсан таза уккан ангу, дукра лялиян дангу, тархундалул дурухлу лагь дайссар, туннурду цIакь байссар, инсан илтIа айссар, шяра къадияйссар.

6. КЬУРЧI

КьурчIуву чIявуссар витамин К ва рутин, мунияту кьурчIул оьттул туннурду цIакь байссар, хъинссар синттава, майрава оь нанисса инсантуран, дукралух тамахI бутайссар.

7. ШПИНАТ

Шиву витаминну гьарзассар, мунищала архIал шиву буссар лютеин ва зеаксантин – антиоксидантру. Чаннан чара бакъа аьркинссар, катаракта хьун къадитайссар. Йод буну тIий шпинат хъинссар щитовидная железалун. Клетчатка чIявусса буну тIий хъинссар кьавс шайминнангу. Цуксса дарувсса дунугу уртту-щин, марцIну миннухун багьангу къабучIиссар.

Ца щюлли чимусул личIаннин, махъсса уртту-щинал оь букьва байссар, цIумуй щаву думиннан къабучIиссар чимус, кьурчI, тархун, мукунма вай къабучIиссар гастрит оьнийн дуркнан, ттиликIрал, ччаруллал цIуцIавурттан. Петрушка, кинза, гъаран, кьурчI, тархун къабучIиссар лякьлуву оьрчI буминнан. Давление лагьминнан къабучIиссар петрушка ва укроп. Шпинат ва кьурчI къабучIиссар ччаруллаву, пурпуххуву чартту буминнан. Кинза къабучIиссар ишемия думиннан, инфаркт хьуминнан, диабет думиннан, тромбофлебитран.

ЦIуллуну битаннав!


Материал подготовила Т. Гаджиева

Мудрость дня

Жизнь прекрасна...

05.08.2020 • Мудрые мысли

Жизнь прекрасна, когда творишь ее сам. Софи Марсо ... Читать далее

Мы ♥ Ислам

Мы в Telegram

Самые читаемые